طريقة عمل الكنافة بالقشطة "زي الحلواني"
مين فينا مش بيعشق الكنافة بالقشطة؟ هي الملكة المتوجة على سفرة الحلويات الشرقية، خصوصاً في رمضان والمناسبات. النهاردة في "طبخة علي السريع"، هقولك على طريقة عمل الكنافة في البيت خطوة بخطوة، وهعرفك سر اللون الذهبي والقرمشة اللي بتدوم، وازاي تطلع معاكي القشطة (الكريمة) متماسكة ودايبة في نفس الوقت، أحلى وأنضف من المحلات بكتير!
التحضير: 30 دقيقة
التسوية: 30 دقيقة
الأفراد: 8 أشخاص
السعرات: 450 ك.ل
مقادير الكنافة المضبوطة
أولاً: خليط الكنافة
- 1/2 كيلو كنافة (يفضل تكون مفرزة ومفرومة)
- 1 كوب سمنة بلدي (سايحة)
- 2 ملعقة كبيرة سكر بودرة (سر اللون الذهبي)
ثانياً: حشو القشطة الكدابة (الكريمة)
- 2 كوب حليب كامل الدسم
- 3 ملاعق كبيرة نشا
- 1 علبة قشطة (اختياري لتعزيز الطعم)
- رشة فانيليا
ثالثاً: الشربات (السيرب)
- 2 كوب سكر
- 1 كوب ماء
- عصرة نصف ليمونة
خطوات التحضير خطوة بخطوة
- تحضير الشربات (أهم خطوة): في حلة على النار، حطي السكر والماية ومن غير تقليب لحد ما يغلوا. بعد الغليان اعصري الليمونة وسيبيه يغلي 7 دقايق واطفى عليه. لازم الشربات يكون تقيل وبارد والكنافة سخنة.
- تحضير القشطة: قلبي النشا مع الحليب على البارد الأول، وبعدين ارفعيهم على النار مع التقليب المستمر لحد ما القوام يتقل ويبكبك. اطفى النار وحطي القشطة والفانيليا وقلبيهم وسيبيها تهدأ شوية.
- تجهيز الكنافة: قطعي الكنافة حتت صغيرة جداً (أو افرميها في الكبة وهي متلجة). حطي عليها السكر البودرة وقلبيهم، وبعدين انزلي بالسمنة السايحة وافركي الكنافة كويس جداً لحد ما تتشرب السمنة كلها.
- رص الصينية: ادهني صينية مقاس 26 سمنة كويس. حطي نص كمية الكنافة واضغطي عليها جامد جداً (ممكن بصينية أصغر) واعملي حواف عالية للكنافة عشان القشطة ما تخرجش وتتحرق.
- صبي القشطة في النص وافرديها بعيد عن الأطراف. حطي باقي الكنافة على الوش بس برفق جداً وبلاش تضغطي جامد المرة دي.
- دخليها فرن سخن مسبقاً على درجة حرارة 200 (الرف الأوسط) لحد ما الحروف تحمر وتفصل عن الصينية، ممكن تشغلي الشواية دقيقة للوش.
- أول ما تخرج وهي سخنة مولعة، اسقيها بالشربات البارد فوراً. سيبيها تبرد شوية قبل التقطيع عشان القشطة تتماسك.
أسرار نجاح الكنافة (اسمع مني):
- السكر البودرة هو السر اللي بيدي الكنافة اللون الذهبي الموحد والقرمشة.
- ضغط الطبقة الأولى أهم مرحلة، كل ما ضغطيها أكتر كل ما طلعت "قالب" واحد ومتماسكة.
- لازم الشربات يكون بارد تماماً "من التلاجة" والكنافة لسه خارجة من الفرن.